Fréttir

Þriðjudaginn síðastliðinn voru Menntabúðir í Skagafirði haldnar í Grunnskólanum austan Vatna á Hofsósi. Þátttaka var mjög góð en yfir 50 manns mættu á málstofurnar sem starfsfólk skólans sá um. Óhætt er að segja að vel hafi tekist til og er skólinn mjög stoltur af öllu því frábæra fólki sem vinnur í skólanum og þarna var vinnu og verkefnum deilt með samstarfsfólki úr firðinum.

Fimmtudaginn 23. janúar fóru nemendur í 1. - 6. bekk á grunnskólamót UMSS í frjálsum íþróttum sem haldið var í íþróttahúsinu í Varmahlíð. Á mótinu tóku nemendur þátt í hinum ýmsu greinum og þrautum, svo sem langstökki, spretthlaupi, boltakasti og ýmsum þrekæfingum. Nemendur tóku glaðir þátt og stóðu sig allir með stakri prýði.

Vegna verulega slæms veðurútlits í Skagafirði og Húnavatnssýslum og yfirstandandi óvissustigs almannavarna föstudaginn 14. febrúar, var á fundi Almannavarnarnefnda Skagafjarðar og Húnavatnssýslna fyrr í dag tekin ákvörðun um að fella niður allt skólahald í leik-, grunn- og tónlistarskólum á Norðurlandi vestra á morgun. Óvissustigi er lýst yfir þegar grunur vaknar um að eitthvað geti gerst af náttúru- eða mannavöldum, sem á síðari stigum gæti leitt til þess að heilsu og öryggi fólks, umhverfis eða byggðar er ógnað.

Vikuna 3. - 6.febrúar var dans- og nýsköpunarvika í GaV. Ingunn danskennari kom til okkar að venju og sá um danskennsluna, sem endaði svo á frábærri danssýningu í Höfðaborg á fimmtudeginum. Þessa vikuna voru allir nemendur skólans saman komnir á Hofsósi og var unnin vinna í tengslum við nýsköpun, sáust margar flottar hugmyndir úr nemendahópnum okkar.

Í gær miðvikudaginn 12. febrúar skellti Grunnskólinn austan Vatna sér á skíði í Tindastól.

Vegna veðurs raskast skólahald í dag að nokkru leiti. Heimakstur verður í Fljót núna strax kl. 11:10. Heimakstur um Óslandshlíð í Hóla verður kl. 14:30 og þá verður skóla lokið. Félagsmál falla niður en fótboltaæfing verður hjá Neista fyrir þá sem komast. Skólahald á Hólum er óbreytt en ekki er gert ráð fyrir akstri í Hofsós þar sem félagsmál falla niður.

Vegna appelsínugulrar viðvörunar Veðurstofunnar hefur verið tekin ákvörðun um að fella allt skólahald í leik- grunn- og tónlistarskóla Skagafjarðar á morgun. Viðvörun þessi er í gildi fram til miðnættis annað kvöld og því útlit fyrir afar slæmt veður í öllum firðinum. Mikilvægt er að brýna fyrir íbúum að vera ekki á ferðinni að nauðsynjalausu og í því sambandi minnt á að Veðurstofan spáir snjókomu og skafrenningi með lélegu skyggni og engu ferðaveðri.